مؤلف شاب يتهم صناع مسلسل نور وولده خالد نور بسرقة فكرته.. تفاصيل

اتهم المؤلف الشاب حاتم حسين، صناع مسلسل نور وولده خالد نور بطولة الفنان شيكو ومحمود كريم عبد العزيز بسرقة فكرته، حيث كتب منشور على حسابه الشخصي، بموقع تبادل التواصل الاجتماعي فيسبوك.

وقال حاتم، في المنشور: طيب يا جماعة مسلسل خالد نور وولده نور خالد فكرته الأساسية ( أب وابنه في نفس السن بيخوضوا رحلة)  مسروقة من مسلسل كنت عامله وبعدها اتحول لفيلم المسلسل كفكرة طلع لأحمد أمين وأكرم حسني وبعت لأمين المعالجة ببريزنتيشن أحمد أمين بكل إحترام قاللي رأيه وتخوفاته من الفكرة ( ممكن أمين يشهد على ده ) بعدها  للأستاذ طارق الجنايني عجبته الفكرة وشاف نحولها لفيلم وفعلا اشتغلت على معالجة الفكرة وتحويلها لفيلم بعدها طارق الجنايني انشغل والموضوع نام ( فيه ايميلات بالمعالجة مبعوتة).

وتابع: المهم الفكرة فضلت موجودة لحد ما بدأت اشتغلها مع نجم كبير ( مش هاقول اسمه ) وفي وسط الشغل فوجئت ببوستر المسلسل.. من الاسم شكيت، كلمت  شريكي في الكتابة  أحمد رشدي  عرفت انه عرض الفكرة على نجم كوميدي ( برضه مش هاقول اسمه) فعجبته جدا وتحمسلها وشاف ان أنسب واحد يعملها معاه هو كريم محمود عبد العزيز وفعلا قابل كريم وقاله الفكرة ( كريم انبهر بالفكرة لكن ما اظهرش اي إهتمام على حسب رواية النجم اللي باثق في كلامه جدا.

وأضاف: كل ده كنت مش متأكد انها نفس الفكرة، كلمت مؤلف المسلسل صديقي قلتله عايز أسألك سؤال هل المسلسل بتاعك قصته ان هيكون اب وابنه في نفس السن بيعملوا رحلة ما ( buddy comedy ) odd couple 
قاللي آه، سألته أنت اللي جايب الفكرة ولا نجم أو منتج قالولك احنا معانا فكرة  logline عايزين نشتغل عليه 
قاللي لا أنا اللي جايبها أنا والي بيكتب معايا، فأنا صدقته.

وأكد: بس بعد كده هو قال للنجم ده ان شيكو هو اللي جاب الفكرة( وده عكس اللي قالهولي)  وانا عاذره لأنه ممكن يبقى مش عايز يلبس حد ... بس هي دي الحكاية، هتقولولي مسجل هاقولكو اه  الفكرة بس ان اللي بيحصل انك بتحور الفكرة وتخلق مبررات تانية وشخصيات تانية بس بتبقى حرقت أكتر عنصر جذاب في الحكاية( اب وابنه في نفس السن بيخوضوا رحلة بين الماضي والحاضر ).

وأضاف: في الآخر هتبقى مش نفس الفكرة ويتقال أصلها اتعملت ميت مرة في أفلام كذا وكذا وتوارد خواطر وكل الكلام الجميل ده، عامل البوست ده ليه، عشان لازم يبقى فيه طريقة تحفظ الحقوق والافكار من سرقة الممثلين والمنتجين اللي بيعتبروا الفكرة يعني حاجة بسيطة، وعشان احنا كمؤلفين بنبيع افكار وبعدين نكتبها لما نتفق عليها مش كل ما هتجيلي فكرة هكتبها فيلم ولا مسلسل قبل ما اعرضها على حد، وتاني اللي بيسرق بيسرق سطر واحد ويعمله بطريقته وبيعتبر ده صياعة 
أكيد متضايق شوية لأن الفكرة دي كنت بحبها جدا وكنت محضرلها حاجات حلوة وكنت هاعملها مع كوميديان كبير باحبه وبقالنا كتير عايزين نشتغل مع بعض، ومتضايق لأنها مش أول مرة تحصل معايا، 
ملحوظة مستعد لأي مواجهة مع أي حد من صناع العمل، تعديل : الفكرة موجودة عندي من شهر ٨ / ٢٠٢١.